المدينة الحنونة يلي بتحضنك بحنان خانق من الرطوبة بتلزق فيك لحتى تسافر منا، منشان هيك بيجوز بيدلعوها وبيقلولها ( اللازقية) لإنها بتلزق. و بنفس هاي المدينة بتتحللى  بكنافة سمعان، وبتبورد بأطيب مشروب بالعالم وهوي عصير الخرنوب البارد. مافي ألز منو... بيقدمو مقهى البستان الراقي. ويلي بيزورو أغلب المثقفين، ولإنو اللهجة اللادقانية مميزة، وبدون ماتحس أو تريد بتسمع الحكي عالطاولة يلي جنبك وانت متشرب عصير الخرنوب

زلم تنين لباسن أنيق قاعدين مقابيل بعض.  مو كبار بالسن بس مشيبين بكير. شلح واحد منون كيس الدوا عالطاولة و حكى بعصبية

 تفضل ياسيدي كل هالدوا وصفو الحكيم

الزلمي التاني: أوووف خير خير، شو صاير معك؟

 الأول: (بعد آآآآه طويلة) قال دوالي!

التاني: بسيطة طول بالك!

الأول: دوالي بالخصيي، فهمان علي؟ بالخصييييي! يعني كان ما في حيل، هلق مارح يضل شي... لسا البواسير وووو...

 التاني: ليش أنا أنظم؟ قلب ع روماتيزم ع مدري شو، ليش ضل شي فينا ماخرب؟ ومنشان شو؟ قال نضال وسياسة! يازلمي تقول سرقنا مصاري الكعبي عشر سنين! تختخنا بالحبوس عالفاضي

 الأول: قال شو؟! "ما في عرس بدون ضحايا" عقولة اليوناني نيكوس كزانتزاكس برواية "المسيح يصلب من جديد"! قال عرس قال! ياريت كنا ضحايا عرس بس يا حسرتي ضحايا جنازة، ولك مالنا عين نطلع بنسواننا! على شو؟ ولمين ؟ كسرو عيونا يارجل.

التاني: ولوو إمو الواحد امو يلي بزرتوا صارت لولا شوي يتتبرا منو! طفش الأهل والأصدقاء من حوالينا، تقول نحنا يلي جبنا الطاعون!!!

 الأول: ياريت اشتغلنا بالحشيش والسرقة كان أشرف، يلعن أبوالسياسة، يارجل الدبّان الأزرق ما بيعرف وين كنّا، بنتي ولدت ودخلت المدرسه ومابتعرف أبوها ميّت ولا عايش.

 التاني: وشهاداتنا صارت للف الفلافل، لاقيمة ولا شي! صرنا شحادين!

 الأول: يا زلمي مو قاهرني غيرهالعالم بس تشوفك من بعيد بتهرب منك! ولووو إنت منشان مين دخلت عالحبس؟ مو منشان هالشعب؟ وينو هالشعب؟ خيو مابدنا "شكراً"، بس نتفة تقدير و احترام ولووو! تقول سرقنا ورثتهم!

 التاني:هادا مو شعب هاد! ليكهم بالشوارع ووين ماكان ناصبين المسرح والمكرفونات بأعلى صوت وزينة ودبكة ودبايح وعزايم وحلويات وعم يحتفلوا تقول محرررين القدس!

 الأول: راحت علينا! وين بدنا نطفش و نهج؟ (وطلعت منو أوووووف بحرقة وكمل) والله الموت .. الانتحار أشرف!

...

عصير الخرنوب صار سخن، وما عاد عصير. انفصلت المي لفوق وتحت كان شي ترسب الخرنوب البني بسافل الكاس وكإنو تراب وماضل من عصير الخرنوب غير مية الحنفي

...

جميل حلاوة: كاتب سوري مقيم في الدانيمارك